LAOAG CITY – Natiliw dagiti uppat nga indibidual gapu iti panagsusugal iti Brgy. 14, Calambeg iti ili ti Piddig.
Basar iti Philippine National Police iti nasao nga ili, nabigbig dagiti suspek nga agtawen ti 33, naasawaan, caretaker; agtawen ti 24, awanan asawa, caretaker; agtawen ti 40, awanan asawa, mannalon nga agpapada a residente ti Brgy. 14, Calambeg iti ili ti Piddig; ken pakairamanan ti maysa pay a lalaki a taga Brgy. Libnaoan iti nasao nga ili.
Segun iti imbestigasion, nakaawat ti impormasion dagiti otoridad rason a dagus dagitoy a napan nagresponde ket ditoyda a naaktuaran nga agay-ayam ti Lucky 9 dagiti maseknan iti maysa a minatayan.
Gapu iti daytoy, nakumpiskar manipud kadagiti suspek ti 40 a pedaso ti playing card, 3 a pedaso ti monoblock chair, 1 a pedaso ti wooden chair, 1 a pedaso ti wooden table, 1 a pedaso ti table cloth ken ti nagbalin a pusta dagitoy nga agbalor ti Php 3,240.00 iti nagduduma a denominasyon.
Kabayatanna, manamnama a mapilaan dagiti suspek ti kaso gapu iti panaglabsing iti Presidential Decree 1602 wenno ti Illegal Gambling Law.
