LAOAG CITY – Balligi a natiliw dagiti uppat nga indibidual iti naiyuswat nga anti-illegal gambling operation iti Brgy. 22- San Cristobal iti ili ti Sarrat.
Inbatad ni PMaj. Carlo Abing, ti hepe ti PNP-Sarrat a manipod iti uppat a natiliw ket tallo dagiti babbai ken maysa a lalaki, agpapada a naasawaan ken residente iti nasao a barangay.
Kuna ni Abing a dua a lawas a nasipsiputan ti iligal a panagsusugal dagiti maseknan gapu iti agsasaruno a reports.
Inbaga na a bayat ti pannakaiyuswat ti operasyon ket dita a naaktuan nga agay-ayam dagitoy ti lucky-9.
Nakumpiskar ti maysa a set a baraha, uppay a tugaw, lamisaan ken ti pusta nga agdagup ti 3,729 a pisos.
Kabayatanna, nagtalinaed iti kustodyar ti PNP-Sarrat dagiti maseknan bayat a maisagsagana ti kaso a panagsalungasing ti PD1602 wenno anti illegal gambling law kontra kadagitoy.
