LAOAG CITY – Naarestar ti uppat nga indibidual gapu iti panagsugalda iti maysa a minatayan iti Brgy. 22, San Cristobal iti ili ti Sarrat.
Segun ken ni P/Capt. Kester Arellano, Hepe ti Sarrat Municipal Police Station, dagiti suspek ket agtawen ti 23, awanan asawa, construction worker, agtawen ti 31, self-employed ken agpada dagitoy a residente ti Brgy. 22 San Cristobal iti ili ti Sarrat, agtawen ti 19, helper ken residente ti Brgy. 10 San Miguel iti ili ti Sarrat ken agtawen ti 37, self-employed ken residente ti Brgy. Tangawan iti ili ti Piddig.
Inbatadna a nakumpiskar dagiti otoridad ti lima a pedaso ti one-thousand-peso bills, 14 a pedaso ti one hundred peso bill, uppat a pedaso ti fifty peso bill, dua a pedaso ti twenty peso, 19 a pedaso ti one peso coin; 65 a pedaso ti five peso coin nga addaan ti pakabuklan a 6, 964 a mapapati a nagbalin a pusta dagitoy.
Malaksid iti daytoy, kunana a naala pay ti kapulisan ti uppat a pedaso ti monobloc chairs, playing cards ken dadduma pay a gambling paraphernalia.
Naammoan a natiliw dagiti suspek kalpasan a naaktuaran dagiti otoridad a nagay-ayam dagitoy ti Lucky 9 iti maysa a minatayan.
Kabayatanna, sumango dagiti suspek iti kaso gapu iti panaglabsingda iti Presidential Decree No. 1602 wenno ti Illegal Gambling.
