LAOAG CITY – Nagballigi dagiti otoridad a nangtiliw kadagiti uppat nga indibidual iti carnival ground iti Brgy. 15 ditoy ciudad ti Laoag iti naisayangkat nga anti-illegal gambling operation partikular iti illegal a pannakaiwayat ti Drop Ball.
Daytoy ti inpakaammo ni Police Staff Sergeant Seymour Belarmino, Duty Desk Officer iti Philippine National Police ditoy ciudad ti Laoag.
Nabigbig dagiti suspek nga isuda Ronald Lucas Jr y Salvador, agtawen ti 31, awanan ti asawa, residente iti Brgy. 23, San Matias, Laoag City; Orlan Paguiirigan y Quindatan, agtawen ti 38, naasawaan, residente iti Annafunan West, Tuguegarao City, Cagayan; Jessie Cardenas y Tugade, agtawen ti 54, awanan ti asawa, taga Brgy. Cuyapo, Nueva Ecija ken ni Jhay Ar Pinto y Gabriel, agtawen ti 27, baro ken taga Brgy. Poblacion East, Muñoz, Nueva Ecija.
Inarestar a dagus dagiti otoridad dagiti suspek kalpasan a naaktwan da dagitoy nga agkolektar ti pusta manipod iti maysa a police officer a nagpammarang kas bettor.
Nakumpiskar pay dagiti otoridad manipod iti ikot dagiti suspek ti P1,000.00 bill a nausar kas bet money, kompleto a set ti gambling paraphernalia a maus-usar para iti Drop Ball, uppat a pedaso nga agmaris ti puraw a plastic trays a pagkolektar iti pusta a naglaon ti P6,108.00 a pusta.
Iti agdama, nagtalinaed dagiti suspek iti Philippine National Police ditoy ciudad ti Laoag para iti pannakaipila ti kaso kontra kadakuada.
