LAOAG CITY – Naisyuan ti citation ticket dagiti uppat a driver ti kurong-kurong iti ili ti Badoc gapu iti panagsalungasing da iti anti-road obstruction.
Segun ken ni PMaj. Joseph Tayaban, ti Hepe ti Philippine National Police iti ili ti Badoc, manarimaan ti panangisayangkat da ti clearing operations iti paset ti national highway a sakupen ti Brgy. Santa Cruz Norte, Santa Cruz Sur agingga iti Gabut Norte.
Inbatadna a nagbalin a naig-iget pay ti panangipatungpalda iti nasao a pagannurutan kalpasan a masansan a maripripar dagiti otoridad nga umad-adu dagiti luglugan a nakaparada wenno agipar-parking iti saan nga umiso a lugar.
Gapu iti daytoy ket makaitunda ti nairot a taray ti trapiko gapu iti naruay a luglugan ti maibatbati kadagiti kalsada a makatubeng iti panagtaray dagiti motorista.
Malaksid iti daytoy, kunana nga adda pay dagiti luglugan nga adda kadagiti igid ti kalsada nga aglaklako ti ikan wenno aniaman a produkto a rason nga adu met dagiti dumagas tapno gumatang a makaapektar kadagiti dumalyasat a lugan.
Innayonna a dagiti maseknan a naikkan ti citation ticket ket agbayad ti sangaribu a pisos kas maiyannatop a pannusa kadagiti naglabsing iti linteg trapiko.
Kabayatanna, nangisayangkat ti Philippine National Police iti ili ti Badoc ti coastal clean-up iti Gabut Norte pakairamanan dagiti Barangay Officials, KKDAT ken dagiti lokal a turista para iti pannakatagiben ti aglawlaw ken baybay.
