Uppat nga indibidual, natiliw gapo iti iligal a panagsusugal iti ili ti Pagudpud

LAOAG CITY – Balligi ti pannakatiliw dagiti uppat nga indibidual iti naiyuswat nga anti-illegal gambling operation iti ili ti Pagudpud babaen kadagiti kameng ti 1^st Provincial First Mobile Company nga indaulwan ni Police. Lt. Col. Marcelino Desamito Jr.

Nabigbig dagiti natiliw nga isuda Amiel Dalumay, agtawen ti 38, empleado ti GSO iti ili ti Pagudpud ken residente iti Barangay Saud; Mar Andres, agtawen ti 39, STL Cashier ken residente iti Barangay Pagburnayan, Vigan City, Ilocos Sur; Vicky Salvador, agtawen ti 54, residente iti Poblacion Uno, Pagudpud ken ni Josie De Guzman, residente iti Barangay San Lorenzo iti ili ti Bangui.

Basar iti 1^st Provincial First Mobile Company, nakaawat da ti report nga adda ti agsusugal iti pagtaengan ti agnagan ti Charlie Lagundino iti Barangay Tarrag iti ili ti Pagudpud.

Iti panagresponde dagiti otoridad ket naaktoan da ti panagay-ayam dagiti suspek iti tong-its.

Nakumpiskar dagiti otoridad ti baraha, tugaw ken lamisaan.

Iti agdama, maisagsaganan dagiti dokumento para iti pannakapila ti kaso a panaglabsing iti Presidential Decree 1602 wenno Illegal Gambling Law.