LAOAG CITY – Balligi ti pannakatiliw dagiti uppat a lallaki gapo iti iligal a panagsusugal iti maysa a minatayan iti Brgy. Francisco, Dingras, Ilocos Norte.
Nabigbig dagitoy nga isuda Jeffer Fiesta, agtawen ti 40, Lodrigo Lazaro Jr., agtawen ti 34, Roel Abiva, agtawen ti 38, agpapada dagitoy a residente iti Barangay Francisco ken ni Reynante Agmata, agtawen ti 47 ken residente met iti Brgy. 6, Nagpatpatan iti ili ti Solsona.
Basar kadagiti otoridad, naaktuan da dagiti suspek nga agay-ayam ti lucky-9.
Nakumpiskar dagiti otoridad ti maysa a set ti baraha, uppat a monoblock chairs, maysa a lamisaan, maysa a table cloth ken 1,660 a pisos a pusta.
Mainaig iti daytoy, kuna ni Barangay Chairman Narciso Oriente iti Barangay Francisco iti ili ti Dingras a kanayon na met a balakadan dagiti kabarangayan na a saan da nga agsusugal.
Inbatad ni Oriente nga iti laksid ti balakad da nga opisyal, arig na ket saan a maisuro dagiti maseknan nangruna no nakainom dagitoy ti nasanger.
Segun kenni Oriente, adda met ti nakabantay iti minatayan iti rabii ngem gapo met iti bannog dan ket napan da naturog ken ti ammo da nga iti agpatnag ket awan ti maisayangkat ti panagsusugal.
Nupay kasta, inbatad na nga adda dagiti nabartek a napan iti minatayan ken maipagarop a dagitoy ti nangidaulo iti panagsusugal.
Kunana nga iti panagturong na iti nagminatay ket inbaga ti pamilya a saan da a nagpasugal ken ti dimmanon iti kapitan ket “family game” ti naiyuswat.
Kabayatanna, inpalgak ni Oriente a dagiti tallo a kabarangayan na a natiliw ket karaman kadagiti narigat a maisuro iti barangay da.
