LAOAG CITY – Uppat nga idibidual dagiti natiliw iti naiyuswat nga anti illegal gambling operation iti Sitio Panabuan iti Brgy. 39-Pasiocan iti ili ti Bacarra.
Binigbig ni PMaj. Arnel Tabaog, ti hepe ti PNP-Bacarra dagiti natiliw nga isuda Jaypee Abucay Sahagun, agtawen ti 35, Roque Mariano, agtawen ti 50, Hipolito Gaoiran, agtawen ti 48 ken Vee Balbin, agtawen ti 28.
Segun kan ni Tabaog, namunganay ti operasyon a nakatiliwan dagiti suspek kalpasan nga adda ti nagreport sekna iti iligal nga aktibidad dagitoy iti maysa a minatayan.
Inbatad na nga apaman a naiyuswat ti operasyon ket naaktuan ti panagay-ayam dagiti suspek ti lucky-9.
Mainaig iti daytoy, nakumpiskar ti P4,799 a pusta pakairamanan ti lamisaan, tugaw ken table cloth.
Kabayatanna, nagpalagip ti Tabaog kadagiti barangay officials a mabantayan a naimbag dagiti nagduduma nga iligal nga aktibidad iti uneg ti barangay nangruna iti panagsusugal iti minatayan.
