LAOAG CITY – Natiliw dagiti uppat nga indibidual iti naiyuswat nga anti illegal gambling operation iti Brgy. Canaan iti ili ti Badoc.
Nabigbig dagiti natiliw nga isuda Mark Anton Yadao y Tulay, agtawen ti 31, laborer ken residente iti nasao a barangay; Reynante Maneja y Agrimano, agtawen ti 35, karpintero; Roberto Rubio, agtawen ti 45, houseboy ken residente iti Brgy. Camanga ken ni Ricardo Labugen y Ibus, agtatwen ti 53, construction worker ken residente iti Brgy. Canaan.
Inbatad ni PMaj. Joseph Tayaban, ti hepe ti PNP-Badoc a naiyuswat ti operasyon kalpasan nga adda dagiti report seknan ti panagsusugal iti arubayan ti maysa a pagtaengan iti nasao a barangay.
Inbatad na nga umabot iti nasurok maysa a lawas ti pannakamonitor ti iligal nga aktibidad sakbay a naiyuswat ti operasyon.
Kuna na a naaktuan nga aggay-ayam ti tong-its dagiti suspek ken adda dagit naggu-umong a nagpusta.
Inbunannag na nga uppat laeng dagiti natiliw nga isu dagitoy ti mismo nga agay-ayam ti baraha idinto a nakataray dagiti nagpusta.
Inbatad ti hepe a manamnama a sumango iti kaso a panaglabsing ti PD 1602 wenno illegal gambling law dagiti maseknan.
Kabayatanna, nakumpiskar ti nagduduma a denominasyon ti ken ti maysa a set ti baraha a nausar iti panagsusugal.
