LAOAG CITY – Ballaigi a naarestar dagiti uppat nga indibidual kalpasan a nagsusugal dagitoy iti maysa a minatayan iti Brgy. 4, San Simon iti ili ti Bacarra.
Nabigbig dagiti suspek nga isuda Melecio, agtawen ti 58, Restito, agtawen ti 75, Dave ken ti agnagan ti Allan nga agtawen ti 34 ken residente ti Brgy. Ganagan iti nasao nga ili.
Segun ken ni Police Major Sheryl Guzman, Hepe ti Philippine National Police iti ili ti Bacarra, nakaawat ti opisinada ti report nga adda ti agsusugal iti nadakamat a lugar rason a dagusda a nangisayangkat ti Anti-Illegal Gambling Operation no sadino naaktuaranda nga agsusugal dagiti suspek ti mahjong.
Gapu iti daytoy, inbatadna a ditoy a nakumpiskar dagiti nausar iti panagsusugal kas ti mahjong tiles, lamisaan, uppat a monoblock chairs ken ti 2,800 ribu a pisos a mapapati a nagbalin a pusta dagiti maseknan.
Inlawlawagna a naiget ti pammilinna kadagiti amin nga opisial ti barangay a bantayanda dagiti kabarangayanda tapno maliklikan nga adda dagiti agisayangkat ti illegal a panagsusugal.
Kunana a sumango dagiti suspek iti kaso gapu iti panaglabsingda iti Presidential Decree 1602 wenno ti Illegal Gambling Law.
Innayonna a bayat a maisursurat daytoy a damag ket adda iti kustudyar ti pulisia dagiti suspek.
