LAOAG CITY – Kinumpirmaran ni Interim Bishop Bermilion Tagalog iti Iglesia Filipina Independiente nga adda iti uppat a padi ditoy Ilocos Norte a makaaw-awat ti pangta ti biag.
Binigbig na dagiti uppat a padi a makaaw-awat ti death threat nga isuda Father Randy Manicad, Father Arvin Mangrubang, Father Clifford Bayug ken Father Sherwin Saclad.
Inbatad na a nangrugi a nakaawat ti death threat dagiti uppat a padi sipud nangiyuswat da ti candle lighting activity bayat ti pannakaselebrar ti International Human Rights Day idi disyembre itay napan a tawen.
Segun ken ni Tagalog, dagiti nasao a padi ti nangidaulo ti inyuswat da a candle lighting activity.
Inlawlawag na a nagpanawagan da laeng idi a masapol a respetaren ti tunggal maysa ken dadduma pay a pakaseknan ti human rights.
Innayon na a saan a rumbeng nga iyaleng-aleng da dagiti pangta a maaw-awat dagiti pada da a padi gapu ta agamak da amangan no makissayan da manen.
Mainaig ti daytoy, kinumpirmaran ni Tagalog nga idi manarimaan ti aktibidad da ket adda dagiti sumagmamano a personalidad a nakasuot ti uniporme ti pulis a napan nagpicpicture.
Nupay kasta, mamati ti padi a saan a pudno a pulis dagitoy gapu ta arig na am-ammo da amin dagiti pulis.
Kabayatanna, kuna ni Manicad nga adda pay dagiti nakamotorsiklo a mangsursurot kenkuana uray sadinno ti pagturungan na.
