LAOAG CITY – Maibilang a nagasat dagiti nakalugan iti bus a naidungpar iti alad ti maysa a resort iti Barangay Davila iti ili ti Pasuquin gapo ta saan a nakana ti sinagaba da a sugat.
Nabigbig dagiti nasugatan a pasaheros a da Jenalyn, agtawen ti 48, residente iti Barangay Cabaritan East, Ballesteros, Cagayan; Melly, agtawen ti 61, naasawaan; Gemma, agtawen ti 57, agpada a residente iti Flora Apayao; ken ti conductor a ni Don Don Jojo Laguna, agtawen ti 41, naasawaan ken residente iti Barangay Centro West, Ballesteros, Cagayan.
Ti driver met iti Florida Bus nga addaan ti plate number a NBO 9907 ket ni Frechelle Corpuz y Cabulisan, agtawen ti 44, driver ken reisdente iti Barangay Poblacion East, Flora, Apayao.
Iti inisyal nga imbestigasyon, bayat nga agpaabagatan ti bus ket napukaw ti driver ti kontrol na iti manibela rason ti pannakadungpar na iti alad ti Resort iti Barangay Davila.
Naitaray met dagiti biktima iti Rural Health Unit iti ili ti Pasuquin a nagsagaba ti minor injuries ken dagitoy ket agpapada nga out-patient.
