LAOAG CITY – Natiliw dagiti uppat a tattao gapu ti panagtutupada da babaen ti operasyon dagiti kameng ti PNP-CIDG iti Brgy. 35 Gabu Sur ditoy siudad ti Laoag.
Nabigbig dagiti suspek nga agtawen ti 32 a lalaki, agtawen ti 47 a lalaki agpada a residente iti nasao a barangay, agtawen ti 46, ken agtawen ti 24 agpada a residente iti Brgy. Cavit.
Maysa met ti nakataray iti operasyon nga agtawen ti 43 a residente iti Brgy. Cavit ditoy siudad.
Segun kenni Police Major Romnick Subia, hepe ti PNP-CIDG, nabayagen a makaaw-awat da ti impormasyon seknan ti maipagarup nga iligal nga aktibidad.
Idi laeng kalman a natiliw da dagiti maseknan babaen operasyon ken nakumpiskar da dagiti ebidensya kas iti tadi, 3,320 a pusta, ken dadduma pay agraman ti maysa a manok a sibibiag ken maysa pay a manok nga addaan ti sugat.
Nagtalinaed iti kustudyar ti PNP-CIDG dagiti uppat ken agtultuloy a mabirbirok ti nakataray a kadua da.
Manamnama a maipila ti reklamo seknan iti iligal a panagtutupada wenno panagsusugal kontra kadagiti suspek.
