LAOAG CITY – Inlawlawag ni Doctor Alan Taylan a ti Urinary Tract Infections (UTI) ket dagiti klase ti sakit a makaapektar iti pagayusan ti isbo ti maysa a tao.
Daytoy ket gapu kadagiti mikrobyo, kangrunaan na ti sumagmamano a klase dagiti bacteria a mangpakapuy iti kabaelan ti bagi a manglaban ti sakit a mapabalin a mangapektar iti baba a paset ti bagi.
Segun ken ni Doctor Taylan, dagiti masansan a sintomas ti nasao a sakit ket ti masansan a panaggurigor, arigna kanayun a makaisbo ngem nasakit ti mabagbagi ti maseknan ken dadduma pay.
Inpakaammo ni Doctor Taylan a kaadoan kadagiti maap-apektaran iti nasao a sakit ket dagiti ubbing a babbai, kasta met dagiti nataengan.
Kuna ni Doctor Taylan a ti pakaalaan pay ti Urinary Tract Infection ket ti saan a pannakabuggo a nalaing ti pwerta dagiti ubbing a babbai idinto a dagiti nataengan ket sexually transmitted.
Inpalgak ti doktor a no nakaro ti paspasaren nga Urinary Tract Infection ket kasapulan a mai-confine iti ospital ken maipaayan ti antibiotic.
Inbalakad ni Doctor Taylan a tapno maliklikan ti Urinary Tract Infection ket pagtalinaeden a nadalos ti bagi kangrunaan na iti pwerta, uminom ti ado a danom malaksid laeng no addaan ti sakit iti puso, liklikan ti kanayun nga uminom iti arak ken dadduma pay.
Innayon na a malaksid iti danom ket napintas pay nga inumen ti tubbog ti niyog.
Mainaig iti daytoy, nagballaag ni Doctor Taylan a no mabaybay-an ti Urinary Tract Infections ket ad-adda laeng a kumaro ken kakaasi ti maseknan, ken no saan a malaingan ket adda ti posibilidad na a positibo ti Human Immunodeficiency Virus (HIV) a kas kadagiti napan nagpapacheck-up kenkuana.
