LAOAG CITY – Natakaw ti “urn” wenno ti dapo ti maysa a pimmusay iti pampubliko a kamposanto iti ili ti Sarrat.
Daytoy ti naladingit nga inpakaammo ni Mr. Justine Batangan, ti kabagian ti natakawan ti “urn”.
Segun kenkuana, tallo a tawenen ti kabagianna a naitabon a nabigbig a ni Mr. Emilio Batangan.
Inbatadna nga agbalor ti “urn” wenno ti nakaikabilan ti na-cremate a nasao a bangkay iti 85 a ribu a pisos.
Mainaig iti daytoy, basar iti Philippine National Police iti ili ti Sarrat nga awan met pay ti naipadanon a kastoy a report kadakuada no sadino daytoy pay laeng ti damo nga adda ti napasamak a panagtakaw ti “urn.”
Kabayatanna, mangnamnama ti pamilia Batangan a maisubli ti “urn” ti kabagianda a pimmusay ken mabirukan ti asinoman nga adda iti likudan ti nasao nga insidente iti kabiitan a panawen.
