LAOAG CITY – Maibilang dagiti airstrikes nga inpatungpal ti Estados Unidos kontra iti bangka ti Venezuela a maipagarop a nagkarga ti ado nga illegal a droga iti Caribbean Sea kas “act of tyranny”.
Daytoy ti inpetteng ni Colombian President Gustavo Petro kagiddan ti panagpanawagan na para iti criminal proceedings kontra kadagiti opisyal ti Estados Unidos no maduktalan iti imbestigasyon a dagiti natay iti panagatake ket Colombians.
Maipalagip a kinumpirmaran ni President Donald Trump a dinadael ti US military ti maipagarop a Venezuelan drug vessel nga adda iti kabaybayan ken agturong iti Amerika.
Kwinestyunaran met dagiti legal experts ken agpanpanday linteg no linabsing ti Amerika ti international human rights laws.
Mainaig iti daytoy, inpalgak ni Colombian President Petro a saan a rebbeng a nangipabanto ti missiles ti Amerika gapu ta mabalin da met a napan pinagsardeng ti bangka ken inarestar dagiti crew na.
Gapu iti daytoy, kiniddaw dagiti Democratic lawmakers iti Washington ti panagsungbat ti White House mainaig iti legalidad ti strikes nga indiskribir dagiti eksperto manipod iti United Nations experts kas extrajudicial executions.
