LAOAG CITY – Ibilang ti US appeals court nga iligal ti kaadoan kadagiti taripa nga inpataw ni US President Donald Trump iti nagduduma a pagilian.
Ti nasao a ruling ket makitkita a makaapektar iti reciprocal tariffs ni Trump a naipataw iti kaadoan a pagilian iti intero a lubong kasta pay ti dadduma a taripa a naipataw iti China, Mexico ken Canada.
Iti desisyon ti US Court of Appeals for Federal Circuit, nagkedkedan na ti argumento ni Trump a dagiti taripa ket napalubusan iti babaen ti Emergency Economic Powers Act ken inawagan na daytoy nga invalid gapu ta maikontra iti linteg.
Naipalaon iti 127 a pinanid ti ruling a saan a nadakamat iti International Emergency Economic Powers Act dagiti taripa wenno awan ti procedural safeguards a naglaon ti nalawag a limitasyon iti otoridad ni Trump a mangipataw kadagiti taripa.
Nadakamat pay a ti bileg para iti panangipataw dagiti taripa ken buwis ket agtultuloy a nakadepende iti US congress ken saan a mapaawan bileg ti linteg daytoy.
Saan met nga agepekto ti nasao a ruling agingga iti Oktubre 14 tapno maipaayan ti panawen ti administrasyon ni Trump a kiddawen iti Korte Suprema nga iggaman ti kaso.
