LAOAG CITY – Pinasingkedan ni United States President Joe Biden a ti lalaki a nagmaneho iti pick-up truck a nangdarusdos kadagiti tattao idiay New Orleans idi kaaldawan ti Baro a Tawen ket miembro ti Islamic State group.
Basar kadagiti report, 15 a tattao ti natay ken di kumurang a 35 ti nasugatan bayat ti panangraut ti nasao a driver iti Bourbon Street iti ciudad ti French Quarter.
Immunan a nabigbig ti drayber ti lugan a ni Shamsud-Din Jabbar, veteran member ti US Army manipud Texas, a natay apaman ti panangpaltog dagiti polis kenkuana.
Segun iti Federal Bureau of Investigation, nasarakan ti bandera ti grupo ti Islamic State iti trak ken iti agdama ket imimbestigaranda ti panangraut gapu ta maibilang daytoy kas “act of terrorism”.
Patien pay dagiti imbestigador a saan a “solely responsible” ti suspek iti panangraut.
Iti agdama mannarimaan ti panangbigbig da kadagiti biktima ken naamuan a karaman kadagitoy ti dati a Princeton University football star, ni Martin “Tiger” Bech.
