LAOAG CITY – Nagpanawagan si United States President Donald Trump kadagiti pagilian a miyembro ti International Criminal Court wenno ICC nga agikkat iti nasao a korte.
Inrakurak daytoy ni Trump iti panagbitla na iti maika-81 nga United Nations General Assembly iti New York.
Inpetteng ti US president a saan nga ipalubos ti Estados Unidos a maimbestigar wenno mausig iti International Criminal Court dagiti soldado nga Amerikano.
Inawagan pay ni Trump ti International Criminal Court a maysa nga institusyon nga “out of control” ken maysa nga “evil group of people.”
Maipalagip a nabayagen a kritikal ti administrasyon Trump iti International Criminal Court.
Idi Hulyo, nagpanawagan met ni US Secretary of State Marco Rubio iti sabali a pagilian nga agsanud iti nasao a tribunal.
Saan a miyembro ti International Criminal Court ti Estados Unidos ken saanna a rinatipakaran ti Rome Statute, ti katulagan a nagserbi a pagibasaran iti panangbukel ti korte.
Ti International Criminal Court, a nakabase iti The Hague, Netherlands, ket addaan ti mandato nga usidegen dagiti indibidwal a maak-akusaran ti genocide, crimes against humanity ken war crimes.
