LAOAG CITY – Natalged ni United States President Donald Trump manipud iti White House Correspondents’ Dinner iti Washington Hilton Hotel kalpasan ti report a pananggandat a pammaltog.
Basar iti Secret Service, maysa nga armado a lalaki ti nanggandat a sumrek iti main screening area ti hotel ken nagpaputok ti shotgun.
Insigida a naibakwit ni Trump, First Lady Melania, Vice President J.D. Vance ken dagiti miembro ti gabinete kabayatan nga agpukpukkaw dagiti bisita ti “Get down!” ken naglemmeng iti sirok kadagiti lamisaan.
Maysa nga agent ti Secret Service ti tinamaan ngem natalged gapu iti protective gear.
Addan iti kustodiar dagiti otoridad ti suspek ken im-imbestigaranda ti insidente.
Iti Truth Social post-na, dinayaw ni Trump ti alisto a tignay ti Secret Service ken law enforcement ken inpasiguradona a natalged ti amin nga opisial.
Ti insidente ket napasamak iti kapada nga hotel no sadinno a ginandat a papatayen ni President Ronald Reagan idi 1981.
Daytoy ti maikatlo a daras a nagbalin a target ni Trump ti gandat a panangatake pakairamanan ti insidente iti Butler, Pennsylvania rally idi 2024.
Naipaganetget ti naiget a seguridad kadagiti pampubliko a panagtitipon ti Presidente gapu iti insidente.
