LAOAG CITY – Kalikagum ni United States President-elect Donald Trump ti pannakaitantan ti pannakaipatungpal ti ban iti TikTok idiay Estados Unidos.
Segun ken ni Bombo International News Correspondent Rene Ballenas manipud idiay Estados Unidos, nag-post ni Trump iti online account-na a mangibagbaga nga aramidenna ti amin a kabaelanna tapno maitantan ti nasao a gannuat.
Inbatadna a no matungpal ti gagemna ket mabalin laeng a maitantan ti pannakai-ban ti nasao a platform iti uneg ti 90 nga aldaw.
Inlawlawagna nga awan ti United States company wenno business a mangayat a gumatang iti Tiktok gapu ta aggapu daytoy nga application iti China a maysa a communist country.
Kunana nga awan met dagiti negatibo a reaksion dagiti minilyon nga Amerikano nga agus-usar ti Tiktok maipanggep iti pannakai-ban daytoy.
Innayonna a nagdesision ti Korte Suprema a mai-ban ti Tiktok iti intero nga Estados Unidos gapu ta dakkel ti pammatida a maus-usar daytoy nga application iti pangta ti seguridad iti pagilianda.
Maipalagip a naikeddeng a mai-ban ti nalatak a platform iti internet a TikTok idiay United States of America a kukua ti maysa a Chinese company a ByteDance inton bigat, Enero 19.
