LAOAG CITY – Kinumpirmaran ni United States President Joe Biden a naikkan daytoyen ti briefing maipapan iti napasamak a pammaltog iti naisayangkat a rally ni dati nga United States President Donald Trump idiay Butler, Pennsylvania no sadino nasugatan ti dati a Presidente idinto ti maysa nga attendee ti pimmusay ken ti mismo a shooter.
Segun ken ni Biden, maragsakan isuna a nakangngeg a natalged ken addan iti nasayaat a kasasaad ita ti dati a Presidente a ni Trump.
Inbatadna nga idanonna ti panagkararag para iti dati a Presidente pakairamanan ti pamiliana ken para kadagiti amin a napan nagatendar iti rally.
Kunana a manarimaanen ti imbestigasion maipanggep daytoy nga insidente nga indauloan ti Secret Service.
Inpetteng ni Biden nga awan ti espasio iti kinaranggas idiay Amerika.
Nagpanawagan daytoy kadagiti amin nga agkaykaysa ken kinondenarna ti nasao a kinaranggas.
Inpasigurado ni Biden a kasaritana ni Trump a manarimaan pay laeng a matamtaming babaen kadagiti doktorna.
Maipalagip a kabayatan ti panagsarita ni Trump iti rally-na ket kellaat nga adda ti nangngeg a nagsasaruno a putok no sadino nasugatan ti lapayag ti dati a Presidente.
Pimmusay ti shooter ken maysa nga attendee apaman a nagresponde ti secret service.
Basar iti liderato ti Secret Service ket agtaltaledteden ti imbestigasion maipanggep iti nasao nga insidente.
