LAOAG CITY – Sumangsango ita ni United States Presidente Joe Biden kadagiti baro a saludsod mainaig iti kandidaturana iti eleksion inton Nobiembre 2024, idiay Estados Unidos.
Daytoy ket gapu pay laeng iti tporario a panagsardeng dagiti pasken ken kampaniana gapu iti panagpositibo na iti Covid-19.
Gapu iti daytoy ket nakipagkita dagiti dua a Democrats ti United States, a da Senate Majority Leader Chuck Schumer ken House Minority Leader Hakeem Jeffries, tapno iyebkasda dagiti pakaseknanda iti panangtarigagay iti White House.
Kinuna pay ni Nancy Pelosi, ti dati a House Speaker ti United States a saan a kabaelan ni Biden nga abaken ni Donald Trump iti 2024 United States Presidential Election.
Maipalagip a sipud nalpas ti debate da Biden ken Trump ket saan a nagsardeng dagiti awag nga agsanud ni Biden gapu iti nagbalin a performance na ken dagiti isyu seknan iti salun-at na.
Kabayatanna, ti pribado a miting da Schumer ken Jeffries ken Pres. Biden idi napan a lawas ket ditoy nga inyebkas da ti pakaseknanda iti posibilidad a makontrol ti Kongreso ti pagilian da.
