LAOAG CITY – Inrakurak ni United States President Donald Trump nga inikkatnan dagiti tropa ti National Guard manipud kadagiti sumagmamano a siudad idiay Estados Unidos pakairamanan ti Chicago ken Los Angeles kalpasan ti desision ti Korte Suprema iti napalabas a lawas a limitarenna ti bilegna nga usaren dagiti tropa.
Inbabawi ti administrasion Trump dagiti legal a pananggandat daytoy a pagtalinaeden a kontrolen dagiti tropa a naka-deploy iti Los Angeles.
Daytoy ket kalpasan nga inbilin ti Korte Suprema a saan a mabalin nga usaren ni Trump dagiti tropa iti Chicago para iti pannakaipatungpal ti linteg iti uneg ti pagilian.
Nadakamat iti rakurak ni Trump ti Portland ken Oregon ngem saan a karaman ti Washington DC no sadinno nga agtaltalinaed dagiti tropa iti panagpatrolya dagitoy.
Mainaig iti daytoy, ti desision ni Trump a mangibilin iti panang-deploy dagiti tropa ti National Guard kadagiti siudad nga ipatpataray ti Demokratiko ket nangitunda kadagiti serye dagiti legal a kaso a mangkarkarit iti bilegna nga aramidenna daytoy.
Kabayatanna, ginasgasut a tropa ti naipatulod iti Chicago ken Portland ngem saan pay a nadutokan tapno agpatrolya kadagiti kalsada kabayatan iti panangtingiting ti Korte.
