LAOAG CITY – Inrakurak ni United States President Donald Trump ti baro a panangipataw ti taripa kadagiti innem a pagilian.
Nangipatuloden ni Trump ti surat kadagiti pagilian nga Algeria, Brunei, Iraq, Libya, Moldova ken ti Pilipinas.
Nailanad iti surat nga addaan ti 30 a porsiento a taripa ti naipataw kadagiti produkto manipud idiay Algeria ken Iraq.
Naipalaon met nga adda ti 25 a porsiento idiay Brunei, Libya ken Moldova idinto a ditoy Pilipinas ket addaan ti 20 a porsiento.
Agbalin nga epektibo ti nasao a baro a taripa inton Agosto 1.
Naammoan a ti nasao a surat ket kagiddan ti panaglippas ti 90 nga aldaw a negotiation period no sadinno a mangrugi ti panag-levy ti agingga iti 10 a porsiento.
Inikkan ni Trump dagiti maseknan a lider kadagiti nasao a pagilian a makinegosasion kenkuana sakbay ti deadline inton Agosto 1.
Nupay kasta, inpetteng ni Trump nga awan ti agbalin nga extension pay para kadagiti pagilian a nakaawat ti surat.
Maipalagip nga idi Lunes ket pinatawan met ni Trump ti 25 a porsiento a taripa dagiti produkto nga aggapu idiay Japan ken South Korea.
