LAOAG CITY – Inbatad ni US President Donald Trump a putden na amin a maipapaay a pondo iti South Africa gapu iti alegasyon a kumkumpiskaren da dagiti daga ken saan a nasayaat ti trato da kadagiti tattao.
Kuna ni Trump nga aramiden na daytoy agingga a saan a malpas ti maisaysayangkat nga imbestigasyon seknan iti daytoy nga isyu.
Inpalgak pay ni President Trump a ti liderato iti South Africa ket agar-aramid kadagiti saan a maiparbeng ken nainkalintegan a banag.
Maipalagip nga iti laeng napalabas a bolan ket pinirmaan ni South African President Cyril Ramaphosa ti gakat para iti panagbalin na a naan-anay a linteg a daytoy ket mangibilbilin iti pannakakumpiskar dagiti daga nga awan pulos ti maited a kompensasyon.
Ti land ownership ket nabayagen nga isyu iti South Africa no sadinno a kaadoan kadagiti farmland ket kukua dagiti puraw a tattao.
Idi 2023 ket nangiyalokar ti Estados Unidos iti agarop $440-million a tulong iti South Africa.
