LAOAG CITY – Inrakurak ni US President Donald Trump nga isuda pay laeng iti mangipataray ti Venezuela kalpasan iti panangarestar da ken ni President Nicolas Maduro karaman ti asawa na a ni First Lady Cilia Flores.
Kinumpirmaran ni Trump iti maysa a press conference a nakaluganen ti US warship da Venezuelan President Maduro ken First Lady Cilia Flores nga agturong idiay New York, no sadinno a sumango da kadagiti kaso kriminal mainaig iti panangusig ti US Department of Justice a mangak-akusar kadakuada a karaman iti panagkukunsabo ti narco-terrorism.
Immuna iti daytoy, inbatad ni US Attorney General Pam Bondi a sumango iti korte ti Amerika ti Venezuelan President no sadinno a dinakamat na ti indictment kontra ken ni Maduro a nakasoan ti “Narco-Terrorism Conspiracy, Cocaine Importation Conspiracy, Possession of Machineguns and Destructive Devices, ken ti Conspiracy to Possess Machineguns and Destructive Devices’ kontra iti Estados Unidos.
Nagyamanan met ti US Attorney General ni US President Donald Trump ken US military, a nangisayangkat ti naballigi a misyon tapno arestaren ti dua a mipagarop nga international narco traffickers.
Maipalagip a nabayagen nga ak-akusaran ti Estados Unidos ni Venezuelan President Nicolas Maduro nga isuna ti lider ti international drug trafficking organisation.
Nupay kasta, namin-adon a daras a naglikudan daytoy ni Maduro.
Immunan a nangidiaya ti $50m a gunguna ti Amerika para iti makaipaay ti impormasyon no sadinno ti lokasyon ni Maduro.
