LAOAG CITY – Inkalintegan ni US President Donald Trump ti panangideploy na iti National Guard idiay Chicago tapno labanan dagiti krimen.
Kas iti inaramid na met laeng iti Washington DC ken Los Angeles ket plano na nga iwaras dagiti kameng ti National Guards iti estado ti Chicago.
Inpetteng ni Illinois lieutenant governor Juliana Statton a saan a natalged ti ar-aramiden ni Trump para kadagiti residente ken daytoy ket mangitunda laeng ti krisis.
Kunana a no adda ti krisis ket ditoy a maipagarop a mangaramid ti eksena si Trump nga isu ti mangisalakan met iti Chicago.
Inbatad met ni Democratic Rep. Chuy Garcia a saan a law and order ti ar-aramiden ni Trump no diket agus-usar ti puwersa tapno mangbutbuteng ken kontrolen dagiti mangkonkontra kenkuana.
Nakasagana met ni llinois Attorney General Kwame Raoul a mangipila ti kaso kontra kenni Trump no bilang ituloy na ti panangideploy na iti National Guard iti Chicago.
Ummunan a nangiparuk-at ti desisyon ti federal judge idiay California a ti plano nga addang ni Trump ket iligal.
Iti nadakamat a desisyon ni US District Judge Charles Breyer, linabsing ni Trump ti Posse Comitatus Act a manglimita iti bilang ti federal government nga agusar ti puwersa ti military para iti domestic a saritaan.
Naamoan nga iti ruling ket saan pay a maipatungpal agingga intono Setyembre 12 ken manamnama met nga iyapela daytoy ni Trump.
Maipalagip nga inpetteng ni Trump a ti panangideploy iti National Guard ket tapno labanan ti krimen iti Los Angeles.
