LAOAG CITY – Insanud ni US President Joe Biden ti kandidatura na para iti US Presidential Race kagiddan ti panangilawlawag na a ti desisyon na ket pagsayaatan ti partido na ken ti pagilian da.
Inrakurak daytoy ni Biden, uppat a bolan sakbay ti pannakaiyuswat ti eleksyon intono Nobyembre ita a tawen.
Ti desisyon ni Biden ket adda ti pakainaigan ti nakaro a panang-pressure kenkuana dagiti pada na a Democrats kalpasan ti saan a napintas a performance na iti debate da ken ni Republican Donald Trump iti napalabas a bolan.
Iti nakapost a surat ni Biden, inbatad na a dakkel a pakaidayawan na ti agserbi kas mangidaulo iti Estados Unidos.
Innayon na a nupay kalikagom na ti agpaidasig koma manen para iti kina-presidente, napanunot na nga ad-adda a pagsayaatan ti partido na ken ti pagilian da no isanud laengen ti kandidatura na ken ipamaysa na iti panangipatungpal kadagiti pagrebbengan na kas mangidaulo iti Amerika iti nabatbati laengen a termino na.
Mainaig iti daytoy, inbatad pay ni Biden a mangipaay ti naan-anay a palawag na mainaig iti daytoy a banag ita a lawas.
Nagyamanan met ni President Biden ni Vice President Kamala Harris nga ibilang na kas “extraordinary partner”.
Kagiddan iti daytoy, inyendorsar ni Biden ni Vice President Harris a pambato ti partido da para iti kina-presidente, banag a sinuportaran dagiti democrats donors ken democrats nga agpanpanday linteg.
Kabayatanna, inpetteng ni dati nga US President Trump nga usto laeng ti panagsanud ni Biden a para presidente iti Amerika gapu ta saanen a makapagserbi a nasayaat.
Nagtalinaed ti takder ni Trump a ni Biden ti kadaksan a nagserbi a presidente iti pakasaritaan ti Amerika.
Nangipaay met ti reaksyon ni Trump seknan iti panangiyendorsar ni Biden ken ti democrats ken ni Harris a kalaban na para iti kina-presidente no sadinno a kuna ti dati a presidente nga al-alisto nan nga abakan ti bise presidente.
