LAOAG CITY – Nagtaripnong da US President Joe Biden ken President-Elect Donald Trump iti white house a ti kangrunaan a nagsaritaan da ket maipapan iti naannayas a presidential transition.
Iti panagkita dagiti dua ket kinablaawan ni Biden ni Trump para iti panagsubli na manen iti White House kagiddan ti panagalamano dagitoy.
Agpada met nga inkari da Biden ken Trump ti naannayas a transition ti turay kalpasan ti nabara a political campaign.
Saan a nakadwa ni Melania Trump ti asawan na iti panagturong na iti White House ngem adda ti surat nga inyawat ni 1st lady Jill Biden a nangipasingkedan na a nakasagana ti team da a mangasistir iti transition.
Kabayatanna, kalpasan ti panagtaripnong dagiti dua ket insigida a pimmanaw ni Trump iti White House ken saanen a nagpainterview pay kadagiti naruay a kameng ti media nga agur-uray iti ruwar.
