LAOAG CITY – Nangiparuk-at ti naiget a pangta ni US President Donald Trump kontra iti Iran no sadinno nga inikkan na laeng ti Tehran ti dua nga aldaw tapno lukatan manen ti Strait of Hormuz gapu ta no saan ket maminpinsan a dadaelen ti Amerika dagiti planta da ti kuryente.
Iti post iti Truth Social, inpetteng ni Trump a dadaelen ti militar ti Amerika dagiti power grid ti Iran, mangrugi iti kadakkelan no saan a naan-anay a palubusan ti nasao a pagilian a magna dagiti barko iti Strait of Hormuz iti uneg ti 48 nga oras.
Namongangay ti tensyon iti de facto blockade ti Iran iti nasao a lugar a pagpagnaan ti 20 a porsyento ti langis iti intero a lubong, rason a ngimmato iti nasurok a $100 ti kada bariles.
Kas panagibales, nagballaag ti militar ti Iran a puntiryaen da met dagiti energy ken desalination infrastructure ti Amerika iti rehiyon no ituloy ni Trump ti pangta na.
Iti baet ti panagngato ti presyo ti krudo ken magatgatang, tinagibassit ni Trump ti istratehiko a kinapateg ti Strait of Hormuz iti US ken inpetteng na a ti nangato a presyo ti langis ket bassit laeng a sakripisyo para iti seguridad iti lubong.
