LAOAG CITY – Idauloan da United States Vice President JD Vance ken United Kingdom Foreign Secretary David Lammy ti taripnong dagiti security officials mainaig iti gubat idiay Ukraine.
Kadua ti dua dagiti Ukrainian officials ken European national security advisers.
Namunganay daytoy kalpasan ti nagbalin a rakurak ni Ukrainian President Volodymyr Zelensky nga awan ti mapasamak a territorial concessions iti Russia kagiddan ti umas-asideg a summit iti nagbaetan ni United States President Donald Trump ken Russian President Vladimir Putin idiay Alaska inton sumaruno a lawas.
Naammoan a nagatendar pay iti nasao a taripnong da Rustem Umerov, Secretary ti National Security and Defence Council iti Ukraine ken Andriy Yermak, mangidadaulo iti opisina ni Zelensky pakairamanan dagiti pannakabagi ti United Kingdom, Estados Unidos, European Union, France, Germany, Italy, Finland ken Nato.
Mainaig iti daytoy, tinawagan ni United Kingdom Prime Minister Keir Starmer ni Ukrainian President Zelensky sakbay ti taripnong no sadinno nga immannugot iti “vital forum” tapno matalantan ti kinakappia.
Immuna iti daytoy, naikeddeng nga agkita ken agtaripnong da Trump ken Putin inton Agosto 15 tapno mapagnunumoan ti maipanggep iti gubat.
