LAOAG CITY – Agtultuloy nga agbirbiruk ni Vice President Kamala Harris kadagiti adda ti kabaelanna nga agbalin a running mate-na para iti eleksion.
Sumagmamano kadagiti agturong iti Washington, DC tapno makasarita ni Vice President ket isuda Governor Josh Shapiro, Senator Mark Kelly ken Governor Tim Walz.
Manamnama a makapili ni Harris ti runningmate-na sakbay ti Democartic National Convention a mangrugi inton Agosto 19 idiay Chicago.
Rumrummuar nga adda ti lima a kandidato ti pagpilpilyan ni Harris a pakairamanan da Kentucky Governor Andy Beshear wenno Transportation Secretary Pete Buttigieg.
Maipalagip a pormal a nagbalin a presidential nominee ti Democratic party ni Harris iti butos dagiti party delegates idi Biernes.
Immunan nga inbatad ni United States President Joe Biden nga ipabus-oynan ken ni Harris ti panangpili no asino ti nasken nga agbalin a runningmate daytoy.
