LAOAG CITY – Naidarum ti maysa a lalaki a taga Virginia gapu iti panangpangtana iti biag ni Vice President Kamala Harris.
Segun kadagiti rekord ti korte, naduktalan da a naruayen dagiti nagbalin a pangta ni Frank Lucio Carillo kada Harris, United States Presidente Joe Biden, Federal Bureau of Investigation Director Christopher Wray, sumagmamano nga opisial ti Arizona, ken sumagmmaano kadagiti kameng ti right-wing online platform a Gettr.
Kas sungbat iti subpoena, naduktalan ti Federal Bureau of Investigation ti 4,359 a post manipud ken ni Carillo a mangpunpuntiria kadagiti nangangato nga opisial agraman ni Harris.
Iti sumagmamano a post, inladawan ni Carillo dagiti nagduduma a wagas a kalikagoman na a patayen ti bise presidente, pakairamanan ditoyen ti kaudian a post na iti online nga “I will cut your eyes out” a ti dakdakamaten na iti daytoy ket ni Vice Pres. Harris.
Sumagmamano nga umasping pay a post ket ti maysa nga Islamophobic post idi 2023, no sadinno a gutgutiguten na dagiti tattao papatayenda amin a Muslim.
Apaman ti panagturong dagiti kameng ti Federal Bureau of Investigation iti pagtaengan ni Carillo, ket nabirukanda ti dua a paltog, agraman ti maysa a pistol a ginatangna idi 2023 ken maysa a rifle a ginatangna laeng ita a tawen 2024 ken inadmitir na nga isuna ti nagpost online.
Kabayatanna, manamnamanga nga inton Huebes, oras idiay Amerika ti hearing tapno maammuan no ni Carillo laeng ti adda iti likudan dagiti pangta kadagiti nasao nga opisyal.
