LAOAG CITY – Binalakadan ni Communications Usec Claire Castro ni Vice President Sara Duterte nga agbasa ti pudno a damag tapno saan a kanayun a fake news ti agbalbalin a source na.
Inbatad ni Castro a masapol a masursurwan ni Duterte nga agbasa tapno saan a kanayun nga agbalbalin a source ti fake news malaksid laengen no iranranta na tapno baliwan ti pudno a napasamak para iti bukod na a pagsayaatan.
Rakurak daytoy ti opisyal kalpasan nga inbatad ti bise presidente a kayat ti Marcos Administration ti agtalinaed iti turay.
Partikular a dinakamat ni Vice Presidente Duterte ti People’s Initiative a maipagarop nga inlungalong ti gobierno.
Segun ken ni Castro, paspasig a patta-patta laeng ti rakurak ti bise presidente.
Innayon na a saan a mabalin nga ikonektar ti People’s Initiative ken ni Presidente Ferdinand Marcos Jr., kangrunaan na ket ti mismo a presidente ti nangibaga idi a saan a prayoridad nti administrasyon ti Charter Change.
Immunan nga inbatad ni Presidente Marcos iti kallabes nga ado pay dagiti napapateg nga isyu a masapol a tutukan ti gobierno.
Inpaganetget ni Castro a no lagipen ket da Senador Robin Padilla ken Congressman Richard Gomez a kaalyado ti bise presidente, ti nangilunglungalong idi ti Charter Change.
