LAOAG CITY – Binalakadan ni Palace Press Officer Claire Castro ni Batangas Rep. Leandro Leviste nga agpa-blotter iti pulisia no pudno a maipagarup nga adda ti pangta iti biagna.
Daytoy ket kalpasan ti rakurak ti kongresista a makaaw-awat isuna ti death threats mainaig iti Cabral files ken kadagiti impormasion nga iparparuk-atna maipanggep iti flood control projects.
Inbatad ni Castro a nasken a mangisubmitir ni Leviste ti ebidensia kas kadagiti text message ken ipakaammo daytoy kadagiti otoridad tapno matingiting ken matratar ti reklamo.
Inpettengna nga addan iti kongresista ti desision no ania nga addang ti aramidenna para iti bukud a seguridad.
Maipalagip a nagbalin nga emosyonal ni Leviste kalpasan ti panangirakurakna mainaig iti kontrobersial a flood control projects.
