LAOAG CITY – Inlawlawag ni Mrs. Corazon Calina, municipal administrator iti ili ti Bangui ti manarimaan ti pannakadevelop ti Usukan Falls a nasarakan iti Brgy. Payac iti nasao nga ili.
Kuna na a daytoy ti proyekto a nagbinnuligan ti lokal a gobyerno iti nasao nga ili ken ti Department of Environment and Natural Resources.
Segun kenni Calina, inawagan da ti Usukan Eco Adventure Park gapu ta ditoy ti pakakitaan dagiti dadakkel a klase ti kayo.
Agserbi pay daytoy a pagadalan dagiti estudyante ken dagiti turista.
Inbunannag ni Calina a manarimaan nga inagnaganan dagiti kameng ti DENR dagiti klase ti kayo tapno maamuan dagiti estudyante ken tattao nga agturong iti Usukan Park.
Inlawlawag na a ti Usukan Falls ket paset iti Banban River Water Shed.
Malaksid dagiti kayo, adda pay dagiti kadaanan a klase ti bato ken rock formations nga adayo a kaarngi dagiti rock formations iti kapurpurawan.
Iti mainaig a damag, inbutaktak ni Municipal Administrator Corazon Calina iti ili ti Bangui nga adda pay ti plantasyon iti Cacao ken iti kawayan.
Daytoy ket babaen iti panagmula a pinunduan ti DENR, PENRO, gobyerno probinsyal ken addaan ti kalawa a 7.5 nga ektarya.
Segun kenni Calina, possible a daywen dagiti adu a turista ti Usukan Eco Adventure Park ken iti Falls rason a nangiwayat da metten ti training seminar dagiti souvenir makers ken dagiti negosyante.
Kabayatanna, inrakurak na nga adu pay ti kueba iti Usukan, adda dagiti trecking a mapan kadagiti kueba, pagpic-nican, butterfly farm ken dadduma pay a napipintas a buya.
Innayon na nga alisto a madanun dagiti bisita ti Usukan Eco Adventure Park iti Brgy. Payac, Bangui gapu ta sementado ti kalsada.
