LAOAG CITY – Record high manen ti sovereign debt ti Pilipinas bayat nga agtultuloy ti panagutang ti gobyerno tapno pondoan ti budget na para kadagiti programa ken proyekto.
Daytoy ket basar iti inparuk-at datos ti Bureau of the Treasury.
Segun iti ahensya, limmobo iti P15.689 trillion a katukad ti 1.3% a panagngato ti P15.483 trillion nga outstanding debt a nairekord iti katapusan ti Hunyo ita a tawen.
Inlawlawag ti ahensya a ti P206.49-bilyon a month-on-month a panagngato ti utang ti pagilian ket gapu iti net issuance ti utang.
Inlawlawag ti ekonomista a ni Michael Ricafort, ti agtultuloy a panagngato ti inflation ket isut ti rason no apay a ngumatngato ti paggastusan ti gobierno.
Malaksid iti daytoy, nangato pay ti interest rate idinto nga apagapaman a gimminad ti sukat ti piso kontra dolyar sipud idi 2022 rason a ngimmato met ti balor ti pagbaybayad nga utang.
Immunan nga inbatad ni Finance Secretary Ralph Recto a mabalin a lumubo pay ti utang ti Pilipinas iti P20 trillion iti panagngudo ti termino ni Presidente Ferdinand Marcos Kr. intono 2028.
