LAOAG CITY – Pinaluspusanen dagiti kameng ti PNP-Badoc ti lalaki a natiliwan a nagikot ti paltog iti Barangay Mabusag Sur iti ili ti Badoc.
Binigbig ni Police Captain Joseph Tayaban, chief of police ti PNP-Badoc ti nasao nga indibidwal a ni Ali Quaiot y Bumanglag, agtawen ti 44, utility worker iti lokal a gobierno iti Pinili ken residente iti Barangay Badio iti nasao nga ili.
Segun kenni Tayaban, ti Quaiot ket nagpyansa ti 120 a ribo a pisos gapo iti panagsalungasing na iti RA 10591 wenno ti Illegal Posession of Firearms and Ammunition, ken nagmulta pay ti tallo ribo a pisos gapo iti panaglabsing na iti Executive Order 22-2020 wenno ti saan a panagisuot ti face mask.
Mainaig iti daytoy, inlawlawag ni Police Lt. Col. Randy Baoit, pannakangiwat ti INPPO a ni Quaiot ket natiliw idi rabii ti Biyernes kalpasan nga adda ti report iti PNP-Badoc nga adda ti aggu-ummong nga ado a tattao iti maysa a minatayan iti Barangay Mabusag Sur.
Gapo iti daytoy, dagus a nagturong dagiti pulis iti nasao a lugar ken ditoy a nakita da nga awan ti face mask ni Quaiot ken adda ti bagpack na.
Iti panangsita dagiti pulis kenni Quiaot ken nagatap da gapo ta kepkepkepan na ti bag na isut gapo na a kinita dagiti otoridad daytoy a nagresulta ti pannakakumpiskar da iti maysa nga 9MM a paltog nga addaan ti innem a bala, dua a pidaso ti bala ti caliber 22 a paltog.
Kuna pay ni Baiot a nupay nakapagpyansan ni Quaiot ket agtultuloy ti panagimbestigar da iti katatao ti maseknan.
Kabayatanna, kinumpirmaran ni Mayor Rommel Labasan iti ili ti Pinili nga utility worker ni Quaiot iti Municipal Agriculture Office iti nadakamat a lugar.
Innayon ti Mayor a gapo iti inaramid ni Quaiot ket posible a maikkat iti trabaho.
