LAOAG CITY – Silulukat ti Volunteers Against Crime and Corruption (VACC) a tumulong iti pamilya ti agina a da Police Master Sergeant Diane Marie Mollenido ken ti anak na a ni John Ysmael Mollenido.
Segun ken ni Volunteers Against Crime and Corruption President Arsenio ‘Boy’ Evangelista, adon dagiti impormasyon a naukkon ti grupo mainaig iti kaso, a mabalin a makatulong iti kampo ti agina nga awan asi a pinatay dagiti suspek.
Nupay kasta, iti agdama ket saan pay nga immasideg ti pamilya dagiti agina iti grupo da.
Kuna ni Evangelista a maawatan da a gagem met ti Philippine National Police (PNP) a dagus a maipaayan ti hustisiya ti pannakatay dagiti agina, aglalo ket agbalbalin a dakkel nga isyu ti nasao a kaso.
Iti baet daytoy, inpasigurado ni Evangelista a mapan da bisitaen ti mansayag dagiti agina ken makisarita da iti pamilya da.
Innayon na a tutukan da ti Volunteers Against Crime and Corruption ti agbalin a development ti kaso.
Maipalagip nga immuna a narekobre ti bangkay ni MSgt. Mollenido iti paset ti Pulilan, Bulacan nga adda ti tama ti paltog iti ulo na, ken kalpasan ti sumagmamano nga aldaw ket nakita met ti bagi ti agtawen ti walo nga anak na iti Victoria, Tarlac, a nabungon ti tape ken garbage bag.
Immunan nga inkari ni Philippine National Police chief Gen. Jose Melencio Nartatez Jr. nga ipaay iti pamilya ti agina ti “full financial and protection assistance.”
