LAOAG CITY – Kalikagum ti Mariano Marcos Memorial Hospital and Medical Center iti siudad ti Batac a mabakunaan ti 100 nga health care workers ita nga aldaw para iti al-alisto ti pannakatudok dagiti naawat a bakuna ti nasao nga ospital
Daytoy ti inpakaammo ni Mr. Jhey-ar Mangati, ti Health Education ken Promotions Officer iti nasao nga ospital.
Mainaig iti daytoy, kuna na a kaaduan dagiti nailista a mabakunaan kontra iti COVID-19 a panakaibilangan dagiti medical practitioners, empleado ti ospital nga agpapaay kas security guards, utility workers ken dadduma pay ket balligi a nabakunaan ti sinovac vaccine.
Inbunannag na nga immabot iti 93 dagiti nabakunaan idi kalman, ti umuna nga aldaw a pannakaisayangkat ti COVID-19 vaccination rollout ditoy probinsya.
Karaman kadagiti immuna a natudukan ni Dr. Luis Jake Rubio, Urologist ken Presidente ti Ilocos Norte Medical Society kenni Dr. Dr. Jose Orosa III, ti Chief of Medical Professional Staff.
Immun-una ngem iti daytoy, inrakurak ni Dr. Maria Lourdes Otayza, ti Chief of Hospital ken Medical Center Chief II ti MMMH&MC a kadagupan ti 2,446 doses ti CoronaVac a naawat ditoy Ilocos Norte manipod Sinovac ti China ket 1,500 doses ti naipaay iti nasao nga ospital nu sadinno a 750 ti target a mabakunaan.
