LAOAG CITY – Inlawlawag ti maysa nga International Criminal Court wenno ICC Accredited Lawyer a ti Interpol ket maysa nga international coordinating organization laeng.
Iti Malacañang press briefing, inrakurak ni Atty. Joel Butuyan a saanen a napateg no red notice wenno diffusion ti inusar a wagas ti Interpol iti pannakikoordinar tapno maiserbi ti warrant of arrest iti pagilian nga adda ti kustodiar ti suspek.
Immuna a kwinestionaran iti panagdengngeg ti Senado no wanted person diffusion wenno red notice ti inpatulod ti Interpol idi agpatulong nga arestaren ni dati a Presidente Rodrigo Duterte.
Nupay kasta, inbatad ni Butuyan, ti napatpateg a konsiderasion iti napasamak ket ti valid a warrant of arrest.
Inpetteng ti abugado ti kinapateg a nagtungpal ti Pilipinas iti obligasion iti Interpol kas member country daytoy.
Innayonna a no saan nga inaramid daytoy ket mabalin a saan met a mapatgan no bilang adda ti request for extradition wenno implementation ti warrant iti maysa a Pilipino wenno asinoman a gangganaet a nakaaramid ti krimen iti pagilian.
