LAOAG CITY – Inpakaammo ni Mrs. Vilma Rances, mangidadaulo ti Community Affairs Office ditoy siudad ti Laoag a nalpasen ti validation-da kadagiti amin a barangay ditoy siudad ti Laoag para iti programa a cleanest and greenest barangay.
Segun kenkuana, manarimaan laengen ti panangtingiting dagitoy no asino ti makastrek iti top 15 a barangay para iti final round iti nasao a programa.
Inbatadna a dagiti mapili a top 15 ket dumalanto manen iti validation tapno masigurado no dagitoy ket intultuloyda met laeng ti pannakapapintas wenno pannakadalus iti barangayda.
Mainaig iti daytoy, kuna ni Rances a ti maideklarar a mangabak wenno ti 1st runner up ket umawat ti 75 a ribu a pisos, 2nd runner ket 50 a ribu a pisos ken 3rd runner up ket 30 a ribu a pisos iti urban ken rural category.
Malaksid iti daytoy, adda pay ti special award a Best in Material Recovery Facility nga umawat met ti 25 a ribu a pisos.
Kabayatanna, nagyaman ni Rances kadagiti amin a barangay captain ditoy siudad ti Laoag nga idadauluan ni Liga ng mga Barangay President Arbee Ablan iti panangsuportada kadaytoy a programa.
