LAOAG CITY – Kinumpirmaran ni Fire Officer 3 Leo Balicao iti Bureau of Fire Protection (BFP) iti ili ti Bangui a nauram ti maysa a van iti maysa a gasolinaan iti Barangay Lanao iti nasao nga ili.
Binigbig ni Balicao ti nangiturong ti van a ni Marlon Torado iti Barangay Poblacion iti ili ti Burgos.
Inbatad na nga iti imbestigasyon da ket kellaat lattan a naggil-ayab ti van kabayatan ti kaadda na iti nasao a paggasolinaan.
Nupay kasta, nakarwar a dagus ni Torado sakbay a dimmakkel ken nagramram ti apoy.
Gapu iti nasao a pasamak, adda ti sumagmamano a paset ti gasolinaan a nairamraman a nauram.
Saan pay a madeterminar ti BFP no mano amin ti balor dagiti nadadael iti nasao nga uram ken no ania ti makaigapu iti daytoy.
