LAOAG CITY – Agtultuloy a birbiroken dagiti otoridad ti riding in tandem a nangpalto-paltog iti maysa a van iti paset ti Brgy. Caraitan iti ili ti Badoc.
Daytoy ti inbpakaammo ni PLt. Vivina Tanacio, ti deputy chief of police iti PNP-Badoc.
Kuna ni Tanacio a basar iti naiyuswat nga imbestigasyon, bayat nga agpapaamianan a direksyon ti van nga inturong ti biktima nga agtawen ti 44, vegetable dealer, tubo iti Brgy. Pagsanahan, Badoc ngem agdama nga agnanaed iti Brgy. Madamba iti ili ti Dingras ket nadlaw na nga adda ti mangsursurot kenkuana a motorsiklo
Gapu iti daytoy, pinaspasan ti biktima ti nagmaneho ngem pinaspasan met a sinaruno dagiti nakalugan iti motorsiklo.
Inbatad ni Tanacio dita a napanunutan ti biktima ti agmenor tapno adda ti gundaway nga ag-overtake dagiti nakamotorsiklo.
Nu pay kasta, iti panagpaigid na ket arigna naisagad iti igid ti kalsada ti van rason a saan a nakapagmaneobra.
Kuna ni Tanacio a dita a nagsubli dagiti nakalugan iti motorsiklo ken ginundawayanda a pinatudoan ti putok ti paltog ti sango ti van ngem nakaliklik ti biktima rason a saan a nagsagaba ti aniaman a sugat.
Kalpasan ti pammaltog ket dagus a naglibas dagiti suspek ken nagturong iti saan a masinunuo a direksyon.
Mainaig iti daytoy, inbatad ni Tanacio nga awan pay ti madeterminar a motibo iti nasao nga insidente.
Nu pay kasta, kuna na a ti ammo laeng a rason ti biktima ket ti kaadda ti utang na.
