LAOAG CITY – Saan nga umanamong ni Ms. Sheryl Nicolas, ti agtakikua iti Vapelocker Shop ditoy siudad ti Laoag maipapan iti plano a pannakai-ban ti panaglako ti vape ditoy pagilian.
Segun kenkuana, daytoy ti maysa a kangrunaan a pagbirokan iti pamiliada no sadino innem a tawenen nga aglaklako dagitoy.
Inbatadna nga awan ti problema iti linteg mainaig iti panaglako ti vape no ammo ti sumurot dagiti dadduma nga aglaklako.
Inlawlawagna a dagiti kangrunaan a gumatgatang kadakuada ket dagiti sumagmamano a government employees wenno private individuals.
Kunana nga iti innem a tawen a panaglaklakodan ket adda dagiti ubbing nga agturturong kadakuada a gumatang ngem saanda a lakoan dagitoy gapu ta ammoda iti sumurot iti panagannuratan.
Inpalgakna a nakapasil iti sango ti puestoda dagiti notice wenno pakaammo kadagiti kustomer dagitoy.
Inpakaammona nga adda ti nasurok-kumurang a 30 a Vape Shops ditoy siudad ti Laoag ngem 3 laeng kadakuada ti kumpleto ti dokumentona a mangipaneknek iti panagoperarda.
Kabayatanna, ginutigot ni Nicolas dagiti padana nga aglaklako ti vape ditoy probinsia nga agpalisensiada tapno legal met laeng iti panaglako dagitoy.
