LAOAG CITY – Inlawlawag ni Dr. Alan Taylan a makuna nga Anti-Health ti Vaporized Nicotine Products Regulation Act gapo ta awan met ti datos a mangpaneknek a no agusar ti vape ket maikkat ti risgo iti epekto ti nicotine manipud iti sigarilyo.
Segun kenni Taylan, anti-youth pay daytoy gapo ta naipababa ti tawen ti mabalin a makagatang no sadinno ket napagbalin a 18 manipud iti 21 a rason a ngumato met ti tsansa nga agusar dagiti agtutubo.
Inpetteng na a “sin product” ti vape gapo ta awan met pulos ti maited daytoy a nasayaat iti salun-at dagiti agusar.
Kunana a ti laeng gagem daytoy ket maikkat ti bisyo a panagusar iti natural cigarette wenno makuna laeng a transition daytoy.
Dinakamat na a manayunan laeng ti sakit dagiti agusar gapo ta posible a ti maysa a tao ket agusar ti vape ken agsigarilyo pay.
Mainaig iti daytoy, kuna ni Dr. Taylan a mabalin a pagga-angawan laengen dagiti agtutubo ti vape nangruna ket adda ti flavor.
Inpalgak na a ti rumbeng a mailawlawag ket no anya ti epekto ti natural cigarette saan ket a mangipromote ti mabalin a pakarisgoan dagiti tattao.
Gapo iti daytoy, kalikagom ni Taylan ken kas kadagiti dadduma a doktor a maisardeng daytoy a gakat ken no adda man ti addang a mangkiddaw kenni Presidente Rodrigo Duterte a mai-veto daytoy ket suportaran na.
Malaksid iti daytoy, kunana a mangrugrugi pay dagiti sumagmamano nga asosasyon kas iti Philippine College of Physicians, Philippine Medical Association ken dadduma pay a mangsuporta iti pannaka-veto daytoy a gakat.
