LAOAG CITY – Nangikabilen ti Vatican ti chimney iti bubong ti Sistine Chapel kabayatan ti agtultuloy a panagsagsagana para iti Conclave a maisayangkat inton Mierkoles, Mayo 7 para iti sumaruno a Santo Papa kas kasukat ti pimmusay a ni Pope Francis.
Kinumpirmaran ti Vatican a balligi met ti naisayangkat a testing iti chimney a konektado iti dua a pakasaritaan a kalan a ti maysa ket naaramid iti cast iron a nausar iti pananguram ti balota sipod idi 1939 ken ti maysa pay ket ti moderno nga unit ti kalan a naaramid idi 2005 ken nausar a pampaasok kas senyal.
Ti asok a padpadaanan, a no nangisit ti rummuar ket mangipasimudaag nga awan pay ti desision idinto a no puraw nga asok, kagiddan ti panagtukar ti kampana ti St. Peter ket senyal nga addan ti baro a Santo Papa.
Iti agdama, agtultuloy ti panangtalantan dagiti kardinal sakbay ti Conclave.
Naammoan a tapno maelektaran, nasken a makaala ti 89 a butos wenno 2/3 ti mayorya ti maysa a kandidato.
Karaman kadagiti kangrunaan a kandidato wenno “papabili” ket isuda Vatican Secretary of State Pietro Parolin ken ti Pilipino a ni Cardinal Luis Antonio Tagle idinto a dagiti dadduma ket aggapu kadagiti nagduduma a kontinente a mangipasimudaag iti panangikagumaan ni Pope Francis nga i-desentralisado ti panangidaulo ti simbaan.
Kabayatanna, iti 133 cardinal nga addaan ti karebbengan nga agbutos, 108 ket appointee ni Pope Francis, a ti kaubingan ket agtawen ti 45 ket ni Ukranian MykolaBy idinto a ti kataengan ket ni Carlos Osoro Sierra, a maysa nga Espanyol nga agselebrar iti maika-80 a panagkasangayna ita a bulan.
