LAOAG CITY – Inbatad ni Venezuelan President Nicolás Maduro a nakasagana a makisarita iti Estados Unidos mainaig iti drug trafficking ken langis, kalpasan ti sumagmamano a lawas a kumarkaro a pressure campaign kontra iti gobierno na.
Iti interview ken ni Maduro, kuna na a nakasagana para iti dayalogo iti nagbaetan da iti Estados Unidos, sadinno man ken aniaman nga oras a kayatda nga ipatungpal.
Liniklikan met ni Maduro ti saludsud kenkuana mainaig iti rakurak ni US President Donald Trump a rinaot da ti maysa a pasilidad iti pantalan iti Venezuela.
Daytoy ti kaunaan a panagatake ti Amerika iti uneg a mismo ti Venezuela.
Immunan a rinaot dagiti tropa ti Amerika dagiti barko a maipagarop a nagkarga ken agibibiyahe ti narcotics babaen ti panagdalyasat da iti Caribbean ken eastern Pacific iti napalabas a tallo a bolan.
