LAOAG CITY – Posible a maiyakar ti venue ti closing ceremony ti Palarong Pambansa 2025 gapu iti manamnama a dakes a sasaaden ti panawen basar ken ni Gov. Matthew Marcos Manotoc.
Segun ken ni Gov. Manotoc, basar iti weather forecast, adda ti posibilidad a saan nga agbalin a napintas ti sasaaden ti panawen inton aglippas ti Palaro a naikeddeng a maisayangkat inton Mayo 31.
Inbatadna a manarimaan ti panangberipikarda tapno makaipaayda ti nasapa nga anunsyo para iti amin.
Ti orihinal a plano ti organizing committee ket maiyuswat ti seremonia iti sango ti naisangsangayan a Paoay Church.
Nupay kasta, gapu iti manamnama a dakes a panawen, manarimaanen ti panangadalda ti opsyon para iti venue.
Mainaig iti daytoy, inpakaammo ni Gov. Manotoc, manamnama nga agatendar iti closing ceremony ni Department of Education Secretary Sonny Angara.
Inladawanna ti pananglipps ti Palaro nga ad-adda a naulimek maidasig iti nagarbo nga opening ceremony a naisayangkat iti napalabas a lawas.
Kunana a ti Palarong Pambansa ket maysa a nakapinpintas nga oportunidad tapno maipakita ti baknang a kultura ken tradision ti Ilocos Norte iti intero a pagilian.
Innayonna a maysa daytoy a napintas a gundaway a saan laeng para iti kultura ti Ilocos Norte no diket para met kadagiti lokal a negosiante nangruna kadagiti Micro Small and Medium Enterprise tapno itandudo ken mailako dagiti produktoda.
Iti agdama, agtultuloy ti monitoring ti Provincial Government of Ilocos Norte kadagiti sporting event ken billeting areas.
